މޯލްޑިވްސް ބްރޯޑްކާސްޓް އެވޯޑްސް 2022

---

ޝަކުވާ ނިންމި ގޮތުގެ ބަޔާން (CAC-01/2024)

November 28, 2024

ޝަކުވާ ނަމްބަރު: CAC-01/2024

ޝަކުވާ ހުށަހެޅި ތާރީޙް: 30 މޭ 2024

ހުލާސާ: މިއީ، ޕްރިސްޓައިން އައިލަންޑްސް އިންވެސްޓްމަންޓް (މޯލްޑިވްސް) ޕްރައިވެޓް ލިމިޓެޑް (މީގެ ފަހުން ޝަކުވާ ރައްދުވާ ފަރާތް) އޮޕަރޭޓްކުރަމުންދާ ދެ ރިސޯޓް ކަމަށްވާ “މާކިއޯ މޯލްޑިވްސް ކޫއްޑޫ” ރިސޯޓް އަދި “ޕުލްމަން މޯލްޑިވްސް މާމުޓާ” ރިސޯޓްގައި ގަވާއިދާ ޚިލާފަށް ރީބްރޯޑްކާސްޓް ކުރަމުންދާ ކަމަށް ބުނެ ހުށަހަޅައިފައިވާތީ ބަލާފައިވާ މައްސަލައެކެވެ. 

ނިންމި ގޮތް: ޕްރިސްޓައިން އައިލަންޑްސް އިންވެސްޓްމަންޓް (މޯލްޑިވްސް) ޕްރައިވެޓް ލިމިޓެޑް  އޮޕަރޭޓްކުރަމުންދާ ދެ ރިސޯޓް ކަމަށްވާ “މާކިއޯ މޯލްޑިވްސް ކޫއްޑޫ” ރިސޯޓް އަދި “ޕުލްމަން މޯލްޑިވްސް މާމުޓާ” ރިސޯޓްގައި ގަވާއިދާ ޚިލާފަށް ރީބްރޯޑްކާސްޓް ކުރަމުންދާ ކަމަށް ބުނެ ހުށަހަޅައިފައިވާތީ ބަލައިފައިވާ ކޮމިޝަންގެ ނަންބަރު CAC-01/2024 މައްސަލައިގައި، ވަކިފަރާތަކަށް ބުރަނުވެ މުސްތަޤިއްލު ތަޙްޤީގެއް ކުރުމުގެ ގޮތުން، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީ އާއި ކަމާބެހޭ ޤާނޫނުތަކުގައި ބަޔާންކޮށްފައިވާ އެންމެހާ ޙައްޤުތައް މައްސަލަ ރައްދުވި ފަރާތަށް ލިބިދެވުނުކަން ކަށަވަރުކުރުމުގެ ގޮތުން، މައްސަލަ ރައްދުވާ ފަރާތަށް ޖަވާބުދާރިވުމަށް ދިން ފުރުޞަތުގައި” މާކިއޯ މޯލްޑިވްސް ކޫއްޑޫ” ރިސޯޓް އަދި “ޕުލްމަން މޯލްޑިވްސް މާމުޓާ” ރިސޯޓްގައި  ރީބްރޯޑްކާސްޓްކުރުމުގެ ޚިދުމަތް ދިނުމަށް އެކްސްޕަވަރ މޯލްޑިވްސް ޕްރައިވެޓް ލިމިޓެޑް އައްޔަންކޮށްފައިވާ ކަމަށް ޝަކުވާ ރައްދުވާ ފަރާތުން ކޮމިޝަނަށް މައުލޫމާތު ދީފައިވާކަމާއި، 

“މާކިއޯ މޯލްޑިވްސް ކޫއްޑޫ” ރިސޯޓް އަދި “ޕުލްމަން މޯލްޑިވްސް މާމުޓާ” ރިސޯޓްގައި ރީބްރޯޑްކާސްޓްކުރުމުގެ ޚިދުމަތް ދިނުމަށް އެކްސްޕަވަރ މޯލްޑިވްސް ޕްރައިވެޓް ލިމިޓެޑަށް ލައިސަންސް ދޫކޮށްފައިނުވާކަމާއި،

މި މައްސަލައާ ގުޅިގެން ޤާނޫނީ ހަމަތަކުގެ މަތިން ތަޙްގީޤުގެ އެންމެހައި އިޖުރާޢަތުތައް ފުރިހަމަކޮށް ކޮމިޝަނުގެ ތަޙްޤީގަށް ލިބިފައިވާ މަޢުލޫމާތުތަކަށް ބަލާއިރު؛ 

” މާކިއޯ މޯލްޑިވްސް ކޫއްޑޫ” ރިސޯޓް އަދި “ޕުލްމަން މޯލްޑިވްސް މާމުޓާ” މި 2 ރިސޯޓުގައި ރީބްރޯޑްކާސްޓްކުރުމުގެ ޚިދުމަތް ފޯރުކޮށްދިނުމަށް ޙަވާލުކޮށްފައިވަނީ އެކްސްޕަވަރ މޯލްޑިވްސް އަށް ކަމަށް ޝަކުވާ ރައްދުވާ ޕްރިސްޓައިން އައިލަންޑްސް އިންވެސްޓްމަންޓް (މޯލްޑިވްސް) ޕްރައިވެޓް ލިމިޓެޑް އިން ކޮމިޝަނަށް މަޢުލޫމާތުދީފައި ވީނަމަވެސް، އެފަދަ ޚިދުމަތެއް ރިސޯޓުގައި ދިނުމުގެ އެންމެހައި އިލްތިޒާމެއް އުފުލަންޖެހޭ ފަރާތަކީ ރިސޯޓް ހިންގާ ފަރާތްކަން އެންގެން އޮތަތީއާ، ރިސޯޓް ހިންގާ ފަރާތުގެ ހައިސިއްޔަތުން ބަލަންޖެހޭ ބެލުންތައް ނުބަލައި، އެ ޚިދުމަތް ކުރިއަށް ގެންދިއުމުގެ ހުއްދަ ދީފައިވާތީ ޕްރިސްޓައިން އައިލަންޑްސް އިންވެސްމަންޓް (މޯލްޑިވްސް) ޕްރައިވެޓް ލިމިޓެޑްގެ ޒިންމާއިން ބަރީއްއަ ވާނެ ހުދޫދެއް އޮތްކަމަށް ނުދެކޭތީއާ، 

މައްސަލައިގެ ތަހުޤީޤަށް ޝަކުވާ ރައްދުވާ ފަރާތުން ފޯރުކޮށްދީފައިވާ މަޢުލޫމާތަށް ނަޒަރުކުރާއިރު، ” މާކިއޯ މޯލްޑިވްސް ކޫއްޑޫ” ރިސޯޓް އަދި “ޕުލްމަން މޯލްޑިވްސް މާމުޓާ” މި 2 ރިސޯޓްގެ ލައިސަންސް ނެތި ރީބްރޯޑްކާސްޓްކުރުމުގެ ޚިދުމަތް ޕްރިސްޓައިން އައިލަންޑް އިންވެސްމަންޓް (މޯލްޑިވްސް) ޕްރައިވެޓް ލިމިޓެޑްގެ ފަރާތުން ދީފައިވާތީ، ޕްރިސްޓައިން އައިލަންޑްސް އިންވެސްޓްމަންޓް (މޯލްޑިވްސް) ޕްރައިވެޓް ލިމިޓެޑް ޤާނޫނު ނަންބަރު 2010/16 (ބްރޯޑްކާސްޓްކުރުމުގެ ޤާނޫނު) އާ ގަވާއިދު ނަންބަރު 2022/R-1 (ރީބްރޯޑްކާސްޓްކުރުމުގެ ޤަވާއިދު) އާ ޚިލާފްއަށް ރީބްރޯޑްކާސްޓްކުރުމުގެ ޚިދުމަތް ދީފައިވާކަމަށް ކަނޑައަޅައި، 

ޕްރިސްޓައިން އައިލަންޑްސް އިންވެސްޓްމަންޓް (މޯލްޑިވްސް) ޕްރައިވެޓް ލިމިޓެޑް، ބްރޯޑްކާސްޓްކުރުމުގެ ޤާނޫނާއި، ރީބްރޯޑްކާސްޓްކުރުމުގެ ގަވާއިދާއި ޚިލާފަށް ރީބްރޯޑްކާސްޓްކުރުމުގެ ޚިދުމަތްދީގެން ކޮމިޝަނުން ފިޔަވަޅުއަޅާ ފުރަތަމަ ފަހަރުކަމުގައިވާތީއާ، ތަޙުޤީޤަށް އެއްބާރުލުންދީ “މާކިއޯ މޯލްޑިވްސް ކޫއްޑޫ” ރިސޯޓް އަދި “ޕުލްމަން މޯލްޑިވްސް މާމުޓާ” މި 2 ރިސޯޓްގައި ކުރިއަށްގެންދިޔަ ޚިދުމަތް ޤާނޫނީ އިމުގެ ތެރެއަށް ވެއްދުމުގެ މަސައްކަތް ކޮށްފައިވާކަން ފާހަގަކުރެވިފައިވާތީ، 30 މޭ 2024 ވަނަ ދުވަހުން ފެށިގެން 24 ޖޫން 2024 ވަނަ ދުވަހާއި ދެމެދު ފާއިތުވެފައިވާ 90 (ނުވަދިހަ)  ދުވަހަށް -/250 (ދުއިއްސަތަ ފަންސާސް) ރުފިޔާގެ މަގުން، 2 ސަރަޙައްދުގައި ޤަވާއިދާ ޚިލާފަށް ދީފައިވާ ޚިދުމަތަށް އެކު ޖުމުލަ -/45000ރ (ސާޅީސް ފަސް ހާސް) ރުފިޔާ އިން ޕްރިސްޓައިން އައިލަންޑްސް އިންވެސްޓްމަންޓް (މޯލްޑިވްސް) ޕްރައިވެޓް ލިމިޓެޑް ޖޫރިމަނާކުރުމަށް ނިންމައި، ޖޫރިމަނާ ފައިސާ ގިނަވެގެން 30 (ތިރީސް) ދުވަހުގެ ތެރޭގައި މި ކޮމިޝަނަށް ދެއްކުމަށާއި،

ރީބްރޯޑްކާސްޓްކުރުމުގެ ޚިދުމަތް ކުރިއަށްގެންދަން ބޭނުންނަމަ ބްރޯޑްކާސްޓްކުރުމުގެ ޤާނޫނާއި ކަމާގުޅޭ ޤަވާއިދުތަކާއި އުޞޫލުތަކުގައި ބަޔާންކޮށްފައިވާގޮތަށް ލައިސަސް ނެގުމަށް ނުވަތަ ލައިސަންސް ލިބިފައިވާ ފަރާތެއް މެދުވެރިކޮށް ޚިދުމަތް ލިބިގަތުމަށާއި، ޕްރިސްޓައިން އައިލަންޑްސް އިންވެސްޓްމަންޓް (މޯލްޑިވްސް) ޕްރައިވެޓް ލިމިޓެޑްގެފަރާތުން ޤަވާއިދާ ޚިލާފަށް ޚިދުމަތް ކުރިއަށްގެންދާނަމަ އެ ޚިދުމަތް ވަގުތުން ހުއްޓާލުމަށް އެންގުމަށް މި މައްސަލަ ބެލި ކޮމިޝަންގެ ޖަލްސާގައި ބައިވެރިވި މެންބަރުންގެ އިއްތިފާގުން މައްސަލަ ނިންމީއެވެ.

13 ނޮވެންބަރު 2024