---

ބްރޯޑްކާސްޓިންގ ދުވަސް ފާހަގަ ކުރުމުގެ ގޮތުން ކޮމިޝަނުގެ ރައީސް ހާއްސަ މެސެޖެއް ދެއްވައިފި

October 4, 2024

 ބްރޯޑްކާސްޓް ކުރުމުގެ ދުވަސް ފާހަގަ ކުރުމުގެ ގޮތުން މޯލްޑިވްސް ބްރޯޑްކާސްޓިން ކޮމިޝަނުގެ ރައީސް މަރިޔަމް ވަހީދާ ހާއްސަ މެސެޖެއް ދެއްވައިފި އެވެ.

މި ދުވަހަކީ ދިވެހިރާއްޖޭގެ މުޖުތަމަޢާއި ސަޤާފަތާއި ޤައުމިއްޔަތު ބައްޓަންކުރުމުގައި އަދި މި ޤައުމުގައި މުއްސަނދި ތާރީޚާއި ތަރައްޤީއަށް ބްރޯޑްކާސްޓިންގ ސިނާއަތް އަދާކޮށްފައިވާ މުޙިއްމު ދައުރު ފާހަގަކުރާ ދުވަހެކެވެ.

މި އަހަރުގެ ބްރޯޑްކާސްޓް ދުވަހުގެ ޝިޢާރަކީ “މާދަމާގެ ތަޞައްވުރު: ބްރޯޑްކާސްޓިންގގެ މުސްތަޤްބަލު ބައްޓަންކުރުން” އެވެ. މި ޝިޢާރު އަލިއަޅުވާލަނީ ދިވެހިރާއްޖޭގެ މުސްތަޤްބަލު އެކަށައެޅުމުގައި ބްރޯޑްކާސްޓިންގގެ މުހިންމު ދައުރު ފާހަގަކުރުމަށެވެ. ބްރޯޑްކާސްޓްކުރުމުގެ ޤާނޫނު (16/2010) ގެ ދަށު ދަށުން އުފައްދާފައިވާ ރެގިއުލޭޓަރީ އިދާރާއެއްގެ ހައިސިއްޔަތުން، ކޮމިޝަނުގެ އަމާޒަކީ ފެންވަރު ރަނގަޅު، ޓެކްނޮލޮޖީގެ ގޮތުން ކުރިއަރާފައިވާ ބްރޯޑްކާސްޓިންގ ދާއިރާއެއް ތަރައްޤީކޮށް ދެމެހެއްޓުމެވެ. މި ޝިޢާރުން ދައްކުވައިދެނީ މި ޞިނާޢަތުން އަޅުގަނޑުމެންގެ ރަށްތައް ގުޅުވައިދިނުމުގެ އިތުރުން، ކުރިމަގުގެ ގޮންޖެހުންތަކަށް ތައްޔާރުވެ، ބައިނަލްއަޤްވާމީ މިންގަނޑުތަކާ އެއްހަމައަކުން ކުރިއަށްދިއުމުގެ ތަޞައްވުރެވެ.

ބްރޯޑްކާސްޓް ދުވަހާއި ގުޅިގެން ކޮމިޝަނުގެ ރައީސް މަރިޔަމް ވަހީދާ ދެއްވި މެސެޖް ތިރީގައި މިވަނީ އެވެ.

ބްރޯޑްކާސްޓް ދުވަހުގެ ތަހުނިޔާ އަޅުގަނޑުގެ އަމިއްލަ ނަމުގައި، ކޮމިޝަނުގެ ނައިބު ރައީސް އަދި ކޮމިޝަންގެ އެންމެހާ މުވައްޒަފުންގެ ނަމުގައި ދިވެހި ރާއްޖޭގެ ބްރޯޑްކާސްޓް ދާއިރާގައި ހިދުމަތް ކުރައްވާ ބޭފުޅުންނަށް އަރިސް ކުރަން.

އަދި ހާއްސަކޮށް، މި ދާއިރާ އަށް ކުރިން ހިދުމަތްކޮށްދެއްވާފައިވާ ބޭފުޅުން ފާހަގަކޮށް، އެ ބޭފުޅުންނަށް ތަހުނިޔާ އަރިސް ކުރަން.

އަދި މި ދާއިރާ ދެމެހެއްޓުމަށްޓަކައި، ޓިވީ ބައްލަވާ އަދި ރޭޑިއޯ އަޑުއައްސަވާ ބެލުންތެރިންނާއި އެހުންތެރިންނަށް ދުވަހު ތަހުނިޔާ އަރިސް ކުރަން.

އާދެ، މިހާރު ދުނިޔޭގައި ބްރޯޑްކާސްޓިންގ މިއޮތީ އެހެން ފަންތިއެއްގައި. ކޮމިޝަންގެ ތަސައްވަރަކީ ދިވެހިރާއްޖެގޭ ބްރޯޑްކާސްޓަރުންނާއި އެކު މަސައްކަތްކޮށް، ދުނިޔޭގެ ބްރޯޑްކާސްޓިން ދާއިރާގެ ޓެޖްނޮލޮޖީއާ އެއް ހަމަކޮށް، ކުރިއަށް އޮތްތަނުގައި އޭގެ ތަމްރީންތަކާއި ތަޖުރިބާގެ އަލީގައި މަސައްކަތް ކުރުން.

އަޅުގަނޑުމެންގެ މިއަދުގެ ޝިއާރަށް ބަލާލިޔަސް މިއޮތީ ވަރަށް އުއްމީދީ ޝިއާރެއް. އެހެން ކަމުން އެ ތަސައްވަރާއި އެއްގޮތަށް މަސައްކަތް ކުރުމަކީ ކޮމިޝަނަށް މުހިއްމު ކަމެއް ކަމުގައި ދެކެން.

އަޅުގަނޑުމެންގެ ދިވެހިރާއްޖޭގެ މިނިވަންކަމާއި، މީޑިއާގެ މިނިވަންކަން ހިފެހެއްޓުމަށް ބްރޯޑްކާސްޓަރުން މުހިއްމު ރޯލެއް އަދާ ކުރޭ.

އަޅުގަނޑުމެންނަކީ ކުޑަ ޖަޒީރާ ގައުމެއް. މި ޖަޒީރާ ގައުމު މައުލޫމާތުގެ ޒަރިއްޔާއިން ދުނިޔެއަށް ހުޅުވާލުމަށްޓަކައި ބޮޑު ބާރެއް ބްރޯޑްކާސްޓަރުންނަށް ލިބިފައިވޭ. އެހެން ކަމުން ރާއްޖޭގެ ރަށްތަކުގެ އަޑުތައް އިއްވާލުމަކީ ކޮމިޝަނަށް މުހިއްމު ކަމެއް. އެގޮތުން ވިސްނާލާއިރު،ކުރިއަށް އޮތް ތާގައި ކޮމިޝަނުން ކޮމިއުނިޓީ ބްރޯޑްކާސްޓިންގ ތައާރަފު ކުރާނެ.

ކޮމިޝަނުން މިވަގުތު އިސްކަމެއް ދީގެން ކުރަމުން އަންނަ މަސައްކަތްތަކުގެ ތެރޭގައި ބްރޯޑްކާސްޓް އެވޯޑް މަސައްކަތް ހިމެނޭ.

މީގެ އިތުރުން ޕްރޮފެޝެނަލް ގުރޫޕަކާއި އެކު ކުރާ އެއް މަސައްކަތެއް އެއީ އޯޑިއަންސް ސާވޭގެ މަސައްކަތަކަކީ. މި ސާވޭގެ ނަތީޖާ ވަރަށް އަވަހަށް ލިބިގެންދާނެ.

ކޮމިޝަންގެ އަމާޒަކީ ބްރޯޑްކާސްޓަރުންނާއި އެކީގައި މަސައްކަތްކޮށް،މި ދާއިރާ ތަރައްގީ ކުރުން. އެހެން ކަމުން ތަމްރީންތަކާއި މެދު ވަރަށް ބޮޑަށް ވިސްނަން. ޓީވީ އިން ފެންނަ ޖާނަލިސްޓުން އިތުރުން ޓީވީ/ރޭޑިއޯގެ ފަހަތުގައި ޓެކްނިކަލް މަސައްކަތްކުރާ ފަރާތްތަކަށް ޓެކްނިކަލް އަދި ޕްރޮފެޝެނަލް ތަމްރީންތަކުގެ ފުރުސަރު ހޯދައި ދިނުމަށް ވަރަށް މަސައްކަތް ކުރަން.

އަދިވެސް އެއްފަހަރު ބްރޯޑްކާސްޓް ދުވަހުގެ ތަހުނިޔާ އަރިސްކުރަން.

ބްރޯޑްކާސްޓިންގ ދުވަސް ފާހަގަ ކުރުމުގެ ގޮތުން ކޮމިޝަނުން ބްރޯޑްކާސްޓަރުންގެ މެދުގައި ބާއްވާ ފުޓްސަލް މުބާރާތެއް އޮކްޓޫބަރު 11-12 ދުވަހު އޮންނާނެ އެވެ. މީގެ އިތުރުން ކޮމިޝަނުން ވަނީ ވިޝަންސް އޮފް ދަ ފިއުޗާ ނަމުގައި ކުރެހުމުގެ މުބާރާތެއް ހުރިހާ ސްކޫލް ދަރިވަރުންނަށް އަމާޒުކޮށްގެން ހުޅުވާލާފައި އެވެ.