ވިޜަން
ބްރޯޑްކާސްޓް ޚިދުމަތުގެ ފައިދާ ދިވެހި ރައްޔިތުންނަށް އެންމެ ފުރިހަމަ ގޮތުގައި ލިބިދިނުން
މިޝަން
ޤާނޫނުއަސާސީން ލިބިދޭ ޚިޔާލުފާޅު ކުރުމުގެ މިނިވަންކަން ޒިންމާދާރުކަމާއި ހަމަހަމަކަމާއެކު ދަމަހައްޓައި އާލާކޮށްދިނުން؛
ދިވެހީންގެ ދީނީ، އިޖުތިމާޢީ، ސަޤާފީ، އިޤުތިޞާދީ އަދި ސިޔާސީ ފޭރާން ރައްކާތެރިކޮށްދިނުން؛
ޤައުމު ބިނާ ކުރުމާއި ޑިމޮކްރެސީ ޢާލާކުރުމަށް މަގުފަހިކޮށްދިނުން؛ ތަފްސީލް
ޝަކުވާ ނިންމި ގޮތުގެ ބަޔާން (CAC-11/2018)
February 4, 2019
ޝަކުވާ ނަމްބަރު: CAC-11/2018
ޝަކުވާ ހުށަހެޅި ތާރީޙް: 10 އޮކްޓޫބަރު 2018
ހުލާސާ: މިއީ، ޗެނަލް 13 އިން ގެނެސްދިން “އޮޅުވާލި ވޯޓު” ޕްރޮގްރާމްގައި 5 އޮކްޓޫބަރު 2018 ދުވަހުގެ 21:40 ގައި، ވޯޓު ވަގަށް ނެގިކަމަށާއި ބޮޑު ވަގު ޝަރީފު ކަމަށް ބުނެ، އިލެކްޝަން ކޮމިޝަންގެ ރައީސް އަޙްމަދު ޝަރީފްގެ ނަޒާހަތްތެރި ކަމާމެދު ރައްޔިތުންގެ ހިތުގައި ޝައްކު އުފެދޭ ޞައްޙަނޫން އަދި ސާބިތުނުހިފޭ ދޮގު މަޢުލޫމާތު ފަތުރައި، އެ ބޭފުޅާގެ ޤަދަރާއި ޢިއްޒަތަށް އުނިކަން ލިބޭގޮތަށް، ރައްޔިތުންގެ ކުރިމަތީގައި މުޚާތަބުކޮށް ދައްކާފައިވާ ވާހަކަތައް ވަގުތުން ޓެލެކާސްޓްކޮށްފައިވާކަމަށް ބުނެ، ހުށަހަޅައިފައިވާ މައްސަލައެކެވެ.
ނިންމި ގޮތް: ޗެނަލް 13 އިން ގެނެސްދިން “އޮޅުވާލި ވޯޓު” ޕްރޮގްރާމްގައި 5 އޮކްޓޫބަރު 2018 ދުވަހުގެ 21:40 ގައި، ވޯޓު ވަގަށް ނެގިކަމަށާއި ބޮޑު ވަގު ޝަރީފު ކަމަށް ބުނެ، އިލެކްޝަން ކޮމިޝަންގެ ރައީސް އަޙްމަދު ޝަރީފްގެ ނަޒާހަތްތެރި ކަމާމެދު ރައްޔިތުންގެ ހިތުގައި ޝައްކު އުފެދޭ ޞައްޙަނޫން އަދި ސާބިތުނުހިފޭ ދޮގު މަޢުލޫމާތު ފަތުރައި، އެ ބޭފުޅާގެ ޤަދަރާއި ޢިއްޒަތަށް އުނިކަން ލިބޭގޮތަށް، ރައްޔިތުންގެ ކުރިމަތީގައި މުޚާތަބުކޮށް ދައްކާފައިވާ ވާހަކަތައް ވަގުތުން ޓެލެކާސްޓްކޮށްފައިވާކަމަށް ބުނެ، ކޮމިޝަނަށް ހުށަހަޅާފައި މިވާ ޝަކުވާއާ ގުޅޭ ކޮންޓެންޓްގައި އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނުއާ ޚިލާފު ކޮންޓެންޓް ހިމެނޭކަމަށް ބެލެވިގެން ކުރިޔަށް ގެންދިޔަ މައްސަލައިގެ ތަޙުޤީޤުގެ މަރުހަލާގައި އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނު އުވާލުމުގެ ޤާނޫނު، 22 ނޮވެންބަރު 2018 ގައި ދިވެހިސަރުކާރުގެ ގެޒެޓްގައި ޝާއިޢުކުރައްވާ އަދި ޢަމަލުކުރަން ފެއްޓެވުމާ ގުޅިގެން، އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނާ ޚިލާފުކަމަށް ބެލެވޭތީ ކޮމިޝަނުން ބަލަމުން ގެންދިޔަ މައްސަލަތައް،
22 ނޮވެންބަރު 2018 އިން ފެށިގެން ބަލަމުންދާނީ ބްރޯޑްކާސްޓްކުރުމުގެ ޤާނޫނުގެ ދަށުން ކަމުގައި ކޮމިޝަނުން ނިންމާފައިވާކަމާއި؛
މިގޮތުން، މި ޝަކުވާއާ ގުޅިގެން ވަކިފަރާތަކަށް ބުރަނުވެ މުސްތަޤިއްލު ތަޙްޤީޤެއް ކޮމިޝަނުން ކުރުމުގައި ތަޙްޤީޤު ކުރެވެމުންދާއިރު، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީ އާއި ކަމާބެހޭ ޤާނޫނުތަކުގައި ބަޔާންކޮށްފައިވާ އެންމެހާ ޙައްޤުތައް މައްސަލަ ރައްދުވި ފަރާތަށް ލިބިދެވުނުކަން ކަށަވަރުކުރުމުގެ ގޮތުން، މައްސަލަ ރައްދުވާ މީޑިއާ ރިންގް ޕްރައިވެޓް ލިމިޓެޑަށް ޖަވާބުދާރިވުމަށް ދިން ފުރުސަތުގައި؛
މައްސަލައަށް ޖަވާބުދާރީވެ، މީޑިއާ ރިންގް ޕްރައިވެޓް ލިމިޓެޑްގެ “ޗެނަލް 13” އިގެ ފަރާތުން ދިން ބަޔާނުގައި މައްސަލައާ ގުޅޭ ކޮންޓެންޓްގައި ވާހަކަ ދެއްކި ބޭފުޅަކު ދެއްކި ވާހަކަ، ޗެނަލް 13 އިން ލައިވް ކުރަމުން ދިޔައިރު ކޮންޓެންޓުގައި ހިމެނެނީ ކޮންބޭފުޅެއްގެ ވާހަކަކަމެއް އަދި ބޭފުޅަކާމެދު ދޮގު ތުޙުމަތެއް ނޫނީ ބޭފުޅެއްގެ އަބުރަށް އަރައިގަންނަކަމެއް ޗެނަލް 13 އަށް ނޭނގޭކަމަށާއި، އެއީ ކޮން ބޭފުޅެއް ކަން ސީދާ ޔަޤީންކަމާއެކު އެނގޭނަމަ އަޑު ކަނޑާލާނެކަމާށާއި، އެ ކޮންޓެންޓް ބްރޯޑްކާސްޓެއް ވެސް ނުކުރާނެކަމަށާއި، މައްސަލައިގެ ކޮންޓެންޓްގެ ޓްރާންސްކްރިޕްޓްގައި ދަށުރޮނގު ދަމާފަ ހުރި ތަންތަނުގައި ފާހަގަކޮށްފަ ހުރީ ބައެއް ބޭފުޅުންނަށް ކިޔާ ވަނަންކަމަށް ބެލެވޭ ބައެއް ނަންކަމަށާއި، އެހެންކަމުން މައްސަލަ ހުށަހެޅި ފަރާތަށް އެ ބޭފުޅާއަށް ނިސްބަތްވާ ގޮތަށް ބޭނުންކުރެވިފައި ހުރި ވާހަކަތަކެއް ކަމަށް އިޙްސާސްކުރެވެނީ ކަމަށް ޗެނަލް 13 އަށް ބޮޑަށް ޤަބޫލުކުރެވޭކަމަށް ބުނެފައި ވީނަމަވެސް؛
މައްސަލައާ ގުޅޭ ކޮންޓެންޓު ބެލިބެލުމުގައި 5 އޮކްޓޫބަރު 2018 ވަނަ ދުވަހުގެ ރޭ 21:39 އިން 21:43 އަށް، ޗެނަލް 13 އިން ‘އޮޅުވާލި ވޯޓު’ ގެ ނަމުގައި ޕިޕީއެމް އޮފީސް ސަރަހައްދުގައި ވަގުތުން ބްރޯޑްކާސްޓްކުރި ޙަރަކާތުގައި ވާހަކަ ދެއްކެވި ބޭފުޅާ، ވާހަކަ ފައްޓާވާފައިވަނީ އިލެކްޝަން ކޮމިޝަންގެ ރައީސް އަޙްމަދު ޝަރީފުގެ ފުރިހަމަ ނަން ބޭނުންކުރައްވައިގެން ކަމަށްވާތީ އާއި، އިލެކްޝަން ކޮމިޝަންގެ ރައީސް އަޙްމަދު ޝަރީފަށް ނިސްބަތްކޮށް ބްރޯޑްކާސްޓްކޮށްފައިވާ ކޮންޓެންޓްގެ ސަބަބުން އެ ފަރާތުގެ އަބުރާއި ޢިއްޒަތަށް އުނިކަން އަންނާނޭ ކަމަށް ފެނުނު ހިނދު، މިއީ ބްރޯޑްކާސްޓްކުރުމުގެ ކޯޑް އޮފް ޕްރެކްޓިސްގެ ތިންވަނަ ހަމައިގެ (1) ވަނަ ނަންބަރު (މީހުންގެ އަބުރުވެރިކަމާއި ޒާތީ ދިރިއުޅުން ރައްކާތެރިކުރުން) އާ ޚިލާފު ކޮންޓެންޓެއް ކަމަށް ކޮމިޝަންގެ ތަޙުޤީޤަށް ސާބިތުވާކަމުގައި ކަނޑައަޅައި؛
މިއީ، ބްރޯޑްކާސްޓްކުރުމުގެ ކޯޑް އޮފް ޕްރެކްޓިސްގެ ތިންވަނަ ހަމައިގެ (1) ވަނަ ނަންބަރާ މީޑިއާ ރިންގް ޕްރައިވެޓް ލިމިޓެޑްގެ “ޗެނަލް 13” އިން ޚިލާފުވި ދެވަނަ ފަހަރުކަމުގައިވާތީ، ބްރޯޑްކާސްޓްކުރުމުގެ ޤާނޫނުގެ 44 ވަނަ މާއްދާގެ (ހ) ގެ (1) ވަނަ ނަންބަރުގެ ދަށުން މިފަދަ ކޮންޓެންޓުތައް ފޮނުވުމުގައި މީހުންގެ އަބުރުވެރިކަމާއި ޒާތީ ދިރިއުޅުމަށް އުނިކަމެއް ނުވަތަ ނިކަމެތިކަމެއް ނުލިބޭފަދަ ގޮތަކަށް ކޮންޓެންޓް ބްރޯޑްކާސްޓްކުރުމުގައި ސަމާލުވުމަށް މީޑިއާ ރިންގް ޕްރައިވެޓް ލިމިޓެޑަށް އެންގުމަށާއި، ބްރޯޑްކާސްޓްކުރުމުގެ ޤާނޫނު ގެ 44 ވަނަ މާއްދާގެ (ހ) ގެ 3 ވަނަ ނަންބަރުގެ ދަށުން މަޢާފަށް އެދި ބަޔާނެއް ނެރުމަށާއި، އެއްވެސް ޝަރުތެއް ނެތި މި ބަޔާން 14 ފެބުރުވަރީ 2019 ވާ ބުރާސްފަތި ދުވަހުގެ ކުރިން، އެއް ރޭ 08:00 އާއި 10:00 އާ ދެމެދު ޗެނަލް 13 އިން ޢާންމުކުރުމަށް މީޑިއާ ރިންގް ޕްރައިވެޓް ލިމިޓަޑަށް އެންގުމަށް މި މައްސަލަ ބެލި ކޮމިޝަންގެ ޖަލްސާގައި ބައިވެރިވި މެންބަރުންގެ އިއްތިފާޤުން ނިންމީއެވެ.
28 ޖަނަވަރީ 2019