---

ވިޝަންސް އޮފް ދަ ފިއުޗާ ކުރެހުމުގެ މުބާރާތުގައި ބައިވެރިވުމުގެ ފުރުސަތު ހުޅުވާލައިފި

September 30, 2024

މޯލްޑިވްސް ބްރޯޑްކާސްޓިންގ ކޮމިޝަނުން “ވިޝަންސް އޮފް ދަ ފިއުޗާ” ނަމުގައި ކުރެހުމުގެ މުބާރާތެއްގައި ބައިވެރިވުމުގެ ފުރުސަތު ހުޅުވާލައިފި އެވެ.

މި މުބާރާތަކީ އޮކްޓޫބަރު މަހުގެ 4 ވަނަ ދުވަހު ފާހަގަކުރާ ދިވެހިރާއްޖޭގެ ބްރޯޑްކާސްޓިންގ ދުވަސް ފާހަގަ ކުރުމުގެ ގޮތުން ރާއްޖޭގެ ހުރިހާ ސްކޫލްތަކުގެ ދަރިވަރުންނަށް އަމާޒުކޮށްގެން ބާއްވާ އާޓް މުބާރާތެކެވެ.

މި މުބާރާތުގެ މަގްސަދަކީ ދަރިވަރުން ބްރޯޑްކާސްޓިން ދާއިރާއަށާއި ރާއްޖޭގައި ހަރަކާތްތެރިވާ ރޭޑިއޯ/ޓީވީ ޗެނަލްތަކުން ފޮނުވާ ކޮންޓެންޓަށް ޝައުގުވެރިކަން އިތުރުކޮށް، ކޮންޓެންޓް އުފައްދާ މީހުންގެ ބުރަ މަސައްކަތް ކުޑަކުދިންގެ އަމިއްލަ ހިޔާލުން ސިފަ ކުރާ ގޮތް ދެނެގަތުމެވެ. ބްރޯޑްކާސްޓިންގ ދާއިރާއާ ގުޅުވާލާފައި މި ފަދަ މުބާރާތެއް އިންތިޒާމް ކުރުމުގެ ބޭނުމަކީ ދަރިވަރުންގެ ފަންނީ ހުނަރު ތަރައްގީކުރުމާއި، ބްރޯޑްކާސްޓިންގ ދާއިރާއަށް ހޭލުންތެރިކޮށް ދިވެހި ކޮންޓެންޓަށް ޝައުގުވެރިކަން އިތުރު ކުރުމެވެ. މިކަމުގެ ސަބަބުން ދިވެހި ބަހާއި، ދިވެހިންގެ ތާރީހާއި އާދަކާދައަށް ލޯބި ކުރުން އިތުރުވާނެ އެވެ.

“ވިޝަންސް އޮފް ދަ ފިއުޗާ” ގައި ބައިވެރިވަމަށް ޝައުގުވެރިވާ ފަރާތްތަކަށް މި އާޓް މުބާރާތަށް ކުރެހުން ހުށަހެޅުމަށް ކޮމިޝަނުން ވަނީ މައިގަނޑު ޝިއާރުތަކެއް ކަނޑައަޅާފައި އެވެ.

މި ޝިއާރު ތަކަކީ؛

“ދަ އިވޮލިއުޝަން އޮފް މީޑީއާ”: މި ޝިއާރަށް ހުށަހަޅާ ކުރެހުންތަކުން ދައްކުވައިދޭންވާނީ ނުވަތަ ލިބޭ މެސެޖަކަށްވާންވީ އިހުގެ ރޭޑިއޯ އިން ފެށި ބްރޯޑްކާސްޓިން މިއަދާ ހަމައަށް އައި އިރު ޒަމާނީ ބްރޯޑްކާސްޓިން ޕްލެޓްފޯމަކަށް ބަދަލުވެފައިވާ ގޮތެވެ.

“ބްރޯޑްކާސްޓް މީޑިއާ އެންޑް ކަލްޗާ”: މި ޝިއާރަށް ހުށަހަޅާ ކުރެހުންތަކުން ދައްކުވައިދޭންވާނީ ރާއްޖޭގެ ސަގާފަތާއި، ތާރީހާއި އަދި އާދަކާދަ ދެމެހެއްޓުމުގައި ބްރޯޑްކާސްޓިން މީޑީއާ އަދާ ކުރާ ދައުރެވެ.

“ބްރޭކިން ނިއުސް“: މި ޝިއާރަށް ހުށަހަޅާ ކުރެހުންތަކުން ބްރޯޑްކާސްޓިން މީޑިއާ އިން ބްރޭކިން ނިއުސް އާއްމުންނަށް ގެނެސްދިނުމަށް އަދާ ކުރާ މުހިއްމު ދައުރު ދައްކައިދޭންވާނެ އެވެ.

ތިން އުމުރު ފުރައަކަށް ހުޅުވާލައިގެން ކުރިއަށް ގެންދާ މި އާޓް މުބާރާތުގައި ކޮންމެ އުމުރު ފުރައަކުން އެއްވަނަ، ދެވަނަ އަދި ތިންވަނަ ހޮވާނެ އެވެ.

މުބާރާތް ބެހިފައިވާ އުމުރު ފުރާތަކަކީ؛

• 6 އަހަރާއި 9 އަހަރު ދެމެދުގެ އުމުރުފުރާ
• 10 އަހަރާއި 13 އަހަރު ދެމެދުގެ އުމުރުފުރާ
• 14 އަހަރާއި 16 އަހަރު ދެމެދުގެ އުމުރުފުރާ

ކޮންމެ އުމުރުފުރައަކަށް މަތީގައި ބަޔާންކޮށްފައިވާ ޝިއާރުތަކުގެ ތެރެއިން ބޭނުން ޝިއާރަކަށް އާޓް ހުށެހެޅުމުގެ ފުރުސަތު އޮންނާނެ އެވެ.މުބާރާތަށް އާޓް ހުށެހެޅުމުގެ ސުންގަޑިއަކީ 20 އޮކްޓޫބަރު އެވެ.

މި އަހަރުގެ ބްރޯޑްކާސްޓިންގ ދުވަހުގެ ޝިއާރަކީ “މާދަމާގެ ތަޞައްވުރު: ބްރޯޑްކާސްޓިންގގެ މުސްތަޤްބަލު ބައްޓަންކުރުން” މިއެވެ. މި ޝިޢާރު އަލިއަޅުވާލަނީ، ދިވެހިރާއްޖޭގެ މުސްތަޤްބަލު އެކަށައެޅުމުގައި ބްރޯޑްކާސްޓަރުން އަދާ ކުރާ މުހިއްމު ދައުރުގެ މައްޗަށެވެ.