---

މައްސަލަ ބަލާތީ، ނޮވެމްބަރ 17ގެ ހެނދުނު 06:00 ގެ ކުރިން “އަންދަލުސް” ދަރުސް ބްރޯޑްކާސްޓް ނުކުރުމަށް ހުރިހާ ބްރޯޑްކާސްޓަރުންނަށް އަންގައިފި

November 16, 2013

“އަންދަލުސް” ދަރުސް އަކީ މޯލްޑިވިއަން ޑިމޮކްރެޓިކް ޕާޓީގެ ކެނޑިޑޭޓަށާއި އެ ޕާޓީގެ މެނިފެސްޓޯއާ ގުޅުވައި ހަޤީޤަތާ ޚިލާފް ވާހަކަތަކެއް ހިމެނޭ ގޮތުން ފާޑު ކިޔާފައިވާ ދަރުސެއް ކަމަށް އިލެކްޝަންސް ކޮމިޝަނުން އެންގެވުމާ ގުޅިގެން، އެ މައްސަލަ ބަލައި ނިމެންދެން، ނޮވެމްބަރ 17 ވަނަ ދުވަހުގެ ހެނދުނު 06:00 ގެ ކުރިން “އަންދަލުސް” ދަރުސް ބްރޯޑްކާސްޓް ނުކުރުމަށް ހުރިހާ ބްރޯޑްކާސްޓަރުންނަށް މޯލްޑިވްސް ބްރޯޑްކާސްޓިން ކޮމިޝަނުން އަންގައިފި އެވެ.

ތިރީގައި މި ވަނީ މި ކަމާ ގުޅިގެން މޯލްޑިވްސް ބްރޯޑްކާސްޓިން ކޮމިޝަނުން މިއަދު ނެރުނު ސަރކިއުލާ އެވެ.

“ޤާނޫނު ނަންބަރު 2008/11 (އިންތިހާބުތަކާ ބެހޭ އާންމު ޤާނޫނު)ގެ 44 ވަނަ މާއްދާގައިވާ ގޮތުން، އިންތިޙާބުގައި ވާދަކުރައްވާ އެއްވެސް ކެނޑިޑޭޓަކަށް ތާއިދު ލިބޭފަދަ ނުވަތަ ތާއީދުކުޑަވާފަދަ ނުވަތަ އިންތިޙާބަށް ނުފޫޒެއް ފޯރަފާނެ އެއްވެސް އަމަލެއް 2013 ނޮވެމްބަރ 15 ވާ ހުކުރު ދުވަހުގެ ހަވީރު 06:00 އިން ފެށިގެން 2013 ނޮވެމްބަރ 17 ވާ އާދިއްތަ ދުވަހުގެ ހެނދުނު 06:00 އާ ދެމެދު އެއްވެސް ވަސީލަތެއްގެ އެހީގައި އެއްވެސް ފަރާތަކުން ނުހިންގުމަށް އިލެކްޝަންސް ކޮމިޝަނުން 14 ނޮވެމްބަރ 2013 އާންމުކޮށް އިޢުލާންކުރައްވާފައި ވަނިކޮށް، ދިޓީވީ، ވީޓީވީ، ޗެނަލް1 އަދި ޗެނަލް 13 އިން 15 ނޮވެމްބަރ 2013 ވަނަ ދުވަހުގެ ރޭ 18:00 ގެ ފަހުން މޯލްޑިވިއަން ޑިމޮކްރެޓިކް ޕާޓީގެ ކެނޑިޑޭޓަށާއި އެޕާޓީގެ މެނިފެސްޓޯ އާ ގުޅުވައި ހަޤީޤަތާއި ޚިލާފް ވާހަކަތަކެއް ހިމެނޭ ގޮތުން ފާޑު ކިޔާފައިވާ “އަންދަލުސް” ކިޔާ ދީނީ ދަރުސެއް ފޮނުވާފައިވާ ކަމަށް އިލެކްޝަންސް ކޮމިޝަނުން މި ކޮމިޝަނަށް ވަނީ އަންގަވާފައެވެ. އަދި އެ މައްސަލަ މި ކޮމިޝަނުން މިދަނީ ބަލަމުންނެވެ.

“ވީމާ، މި މައްސަލަ ބަލައި ނިމެންދެން، 2013 ނޮވެމްބަރ 17 ވާ އާދިއްތަ ދުވަހުގެ ހެނދުނު 06:00 ގެ ކުރިން “އަންދަލުސް” ދަރުސް ބްރޯޑްކާސްޓް ނުކުރުމަށް ރާއްޖޭގެ ހުރިހާ ބްރޯޑްކާސްޓަރުންނަށް އަންގަމެވެ.“