ޝަކުވާ ނިންމި ގޮތުގެ ބަޔާން (IMCAC-07/2015)
ޝަކުވާ ނަމްބަރު: IMCAC-07/2015
ޝަކުވާ ހުށެހެޅި ތާރީޙް: 11 އޮކްޓޯބަރ 2015
ހުލާސާ: މިއީ، އެމް.ޑީ.ޕީ ހަރުގޭގައި ބާއްވާ ޖަލްސާތަކާއި ހަރަކާތްތައް ލައިވްކޮށް ދެއްކުމުގެ އެކްސްކުލޫސިވް ރައިޓްސް ހަމައެކަނި ރާއްޖެ ޓީވީއަށް ލިބިފައިވަނިކޮށް ސަންގު ޓީވީ އިން އެމް.ޑީ.ޕީ ހަރުގޭގެ ހަރަކާތްތައް ލައިވްކުރާކަމަށް ބުނެ އިންޓަރނަލް މޮނިޓަރިންގ އިން ހުށަހަޅާފައިވާ މައްސަލަ
ނިންމި ގޮތް: ޙަވާލާދީފައިވާ މައްސަލައިގައި، އެމްޑީޕީ ހަރުގޭގައި ބާއްވާ ޖަލްސާތަކުގެ ލައިވް ކަވަރޭޖް ދެއްކުމުގެ އެކްސްކުލޫސިވް ރައިޓްސް ވަކި ޗެނަލަކަށް ދިނުމަކީ، ޤާނޫނު އަސާސީގެ 27 ވަނަ މާއްދާއިން ކަށަވަރު ކޮށްދޭ ޚިޔާލުފާޅުކުރުމުގެ މިނިވަންކަމަށާއި ޤާނޫނު އަސާސީގެ 28 ވަނަ މާއްދާއިން ކަށަވަރަރުކޮށްދޭ ނޫސްވެރިކަމުގެ މިނިވަންކަމަށް އުނިކަން އަންނަ ކަމަކަށް ވީހިނދު؛
އަދި ވަކި ޗެނަލަކަށް އެކްސްކުލޫސިވް ރައިޓްސް ދިނުމުން ބްރޯޑްކާސްޓްކުރުމުގެ ޤާނޫނުގެ 2ވަނަ މާއްދާގެ (ހ) “ދިވެހިރާއްޖޭގެ ޤާނޫނު އަސާސީގެ ދަށުން ލިބިދޭ ޚިޔާލުފާޅުކުރުމުގެ މިނިވަންކަން ދަމަހައްޓައި އާލާކުރުން” އަދި ބްރޯޑްކާސްޓްކުރުމުގެ ޤާނޫނުގެ 2ވަނަ މާއްދާގެ (ނ) “މި ޤާނޫނުގެ ތަރަހައިގެ ތެރޭގައި ހަބަރާއި މަޢުލޫމާތު ފެތުރުމުގައި އެއްފަރާތަށްވުރެ ގިނަފަރާތަކަށް ބައިވެރި ވެވޭނެގޮތް، ހަމަޖައްސައިދިނުމާއި،ތަފާތު ބާވަތުގެ ހިޔާލުތަކަށާއި ތަފާތު ވިސްނުންތަކަށް، ފުރުސަތު ލިބޭނެގޮތް ހަމަޖައްސައިދިނުން” ގެ މަޤްސަދަށް އުނިކަން އަންނަ ކަމަށް ވެސް ވީހިނދު؛
އަދި ސިޔާސީ ޕާޓީގެ ޤާނޫނުގެ 6ވަނަ މާއްދާގެ (ށ)ގައި ބަޔާންކޮށްފައިވާ “ޕާޓީގެ އެންމެހައި ކަންކަން ފާޅުކަންބޮޑުކޮށް ދެފުށްފެންނަ ގޮތަށް ބެހެއްޓުން” އަދި މި މާއްދާގެ (ނ)ގައި ބަޔާންކޮށްފައިވާ “ޕާޓީގެ ކަންކަން މީޑިއާގެ އެހެން ވަސީލަތްތައް މެދުވެރިކޮށް ރައްޔިތުންނަށް ހާމަކުރަމުން ގެންދިއުން” ކަމުގައި ބުނެފައިވީ ހިނދު، މި ކަމަކީ ނޫސްވެރިކަމުގެ މިނިވަންކަމަށް ހުރަސް އެޅޭފަދަ ކަމެއްކަމަށް ކޮމިޝަނަށް ފެނުނު ހިނދު؛ ޤާނޫނު އަސާސީންނާއި ޤާނޫނުތަކުން ނޫސްވެރީންނަށް ލިބިދީފައި އޮތް ހައްޤު އެންމެ ފުރިހަމަ ގޮތުގައި ބޭނުން ހިފޭނޭ ފަދަ މާހައުލެއް ދެމެހެއްޓުމުގެ ގޮތުން ހަމަހަމަކަމާއެކު ބްރޯޑްކާސްޓަރުންނަށާއި އަދި ޖުމްލަ ގޮތެއްގައި މުޅި މީޑިއާއަށް ފުރުސަތުލިބޭނެ ފަދަ ގޮތަކަށް މަގުފަހިކުރުމަށްޓަކައި މިފަދަ ޕަބްލިކް އިވެންޓްތަކުގެ އެކްސްކްލޫސިވް ރައިޓްސް ވަކި ބްރޯޑްކާސްޓަރަކު ނެގުމަކީ ކޮމިޝަނުން ގަބޫލުކުރާ ކަމެއް ނޫންކަމުގައި ރާއްޖެ ޓެލެވިޜަން ޕްރައިވެޓް ލިމިޓެޑަށް އެންގުމަށް މި މައްސަލަ ނިންމި ޖަލްސާގައި ބައިވެރިވި މެމްބަރުންގެ އަޣުލަބިއްޔަތުން ނިންމީއެވެ.
20 އޮކްޓޫބަރ 2015